Waterdüörsken up de Upkamer

Dä, nu häbb wi`t. Piärd statt Rind häbbt se us andreiht. Un wenn se de nich graut üöwer schriëwen harren, harre et kinener miärkt. So wat häff et all äher giewen. All mien Opa vertellde, dat fröher manges `n Hasenbraoden up`n Disk lagg, de in sien Liärwen „Miau“ makt häff. Off iärben auk `n Rinderbraoden de maol wiehert häff. Harre de Hushäer dann doch miärkt, wat se em unnerschuorwen harren, dann konn et woll sien, dat he so ut luter Aperie äs son`n aollen Klopphengst net de Föte up`n Buorden an`t stampen föng. Alls lachede, - män kienener sagg wat. – Män dat will ick nich huopen, - dat an`n naigsden Gusdagg kinener wat sägg, wenn us wi üm Klock siëben wier to`t Waterdüörsken up de Upkamer trefft. Well weet, vellicht föllt denn enen of annern noch wat to dat Thema Katte, off Piärd up`n Teller in. Bis daohen, „laot`t ju de Tied nich lang wäern“.